Энэ өндөр байшингуудыг гайхаад л …
Улаанбаатарын төв хэсэгт заримдаа гишгэх газар олдохгүй тэвдүүлдэг болоод байгаа. Зам нь хэвээрээ мөртлөө машин, байшин хоёр улам нэмэгдэж, бөглөрөл түгжрэлээс салахаасаа одоо өнгөрсөн.
Саяхан РС тоглоомын газарт аллага болсон гээд байгаа МУИС-ийн арын 27 дугаар байрны хажууд арван давхар гозгор харандаа шиг барилга барьчихаж. Олон малтай айлын хонины хашаанаас томгүй газарт шүү дээ.
Зөвшөөрлийг нь ч яахав нөгөө олигархиудаас авлигадаад авчихдаг юм байгаа биз. Дараа нь өөрсдөө энэ байшиндаа яаж орцгоох, хүрцгээх юм бол гэдгийг нь гайхаад л…
Айл ч суудаг бай. Албан газар ч болдог бай. Тэр өндөр байшинд хэдэн хүн очих, байх билээ. Тэр тоолонгоор ирэгсэд машинаа хаана зогсоох юм бол. Хүмүүс нь морь унаад ирсэн ч гаднаа багталцахгүй гэдгийг огт тооцоолоогүй нь хачирхалтай. Өөр олон барилгуудыг шигтгэж өгч байна, энэ хотод. Тэнд оршин суугчдын машин зогсох газар нь дүүрч гэхэд хүүхдээ аль цэцэрлэг сургуульд өгөх юм. Тэр нь байхгүй.
Олон улсын бүх том хотууд хэсэгхэн газарт өндрүүд нь шаваастай, бусад эргэн тойронд гурваас илүү давхаргүй хауснууд, цэцэрлэгүүд л үргэлжилдэг. Газрын ганжин болсон Японд ч тийм. Ухвар мөчдөөр дүүрсэн Улаанбаатар үлийний нүхнээс дор балай болчихлоо. Ж.ГАНГАА
